28‏/02‏/2013


دموع فى الميكروباس 

شاورت للميكروباس عشان اركب واروح الشغل قعدت فى الكنبه اللى وراهم
...كان باين عليهم متجوزين عشان كانوا بيتخنقوا ....يظهر ملحقوش يخلصوا  الخناق فى البيت، قالوا نكمل بقى فى الطريق
 الست ياعينى قاعده تكلمه وهى بتسح دموع وشكلها بيصالحه وهو مديها بروفيل ومش عايز يبصلها ...صعبت عليا وقعدت طول السكه ادعى واقول يارب اصلح ما بينهم...يارب ابعد الشيطان عنهم ....وهو ابدا لا بيرق ولا بيحن ....بعد شويه لقيت حادثه على الطريق والاسعاف شايله واحد على النقاله ...قلت يارب استر على بقيت اليوم ..صحبتنا ما بطلتش عياط طول السكه..... بس اخيرا الحجر اللى جنبها بصلها ....قلت خير قلبه رق.... لكن لقيته بيقولها : أكتمى بقى ....راحت هى مزوده البكى وتطلع فى  كلينكس تمسح دموعها  وترمى المناديل  فى الميكروباس.- تطلع ،تمسح ، ترمى ... يجى ساعه وهى على ده الحال ...لحد ما تعبتنى انا وانفجرت فى سرى وقلت اكتمى زى مابيقولك يا ختى،  يقطع الراجل اللى بكيت بسببه دموع سنتين ادام ، قلبه مش بيلين بالدموع ! جربى تلينيه بحله محشى !! ما نفعش !! !! جربى بطاطس الفرن ، ما نفعش.... خليه يعيش النكد مع نفسه شويه ، ماهى مدرسه الجواز لازم يبقى فيها حصتين ...تلاته نكد فى الاسبوع ، والدنيا بتمشى ...كان ذنبى انا ايه ؟؟؟؟ تنكدى عليا فى اول النهاروتقفلى اليوم كده ؟؟؟؟ وذنب سواق الميكروبا س ايه ....فى المناديل اللى اترمت فى العربيه وهيقعد يلمها وهو بيدعى عليك .؟؟؟؟؟.وذنب اصحابى فى الفيس بوك  ايه ..؟؟؟؟؟؟.انك تنكدى عليهم بعد ما خلتينى من الغم اللى صابنى .... احكلهم وافضفض معاهم . استغفر الله العظيم......
 يارب اهدي كل المتزوجين .